Тишини

Романот „Тишини“ е првообјавениот роман на еден од најважните светски писатели на дваесеттиот век, Меша Селимовиќ. За својот првообјавен роман Селимовиќ ќе каже: „Од 1951 до 1961 година настапи период на молчење. Малку обесхрабрен, малку незадоволен од тоа што го пишував, се подготвував за големата пресметка со самиот себе. Сè уште неподготвен да напишам роман за убиениот брат, пишував други работи. Во 1961 година е објавен романот ’Тишини‘. Тишини. Роман за човек што излегува од војната, кој во војната изгубил сè и кому му се создаваат страшни тишини на преминот од едниот во другиот живот. Иако романот е пишуван во прво лице и има форма на исповед, не е автобиографски. Но дилемите за кои зборуваат Тишините беа дилеми на многумина од нас кога се вративме од војната. Проблемот е морален и се сведува приближно на прашањето: што губи човекот кога го губи своето лично и што добива во заедничката придобивка.“