Избор од Зборникот

Зборникот на Браќата Миладиновци е објавен во 1861 година и со право се нарекува книга над книгите, односно огледало на животот на македонскиот народ и потврда на неговата поетска дарба. Тој е дело со речиси 600 македонски народни песни, а неговото значење за развојот на македонската култура е огромно. Димитар и Константин се родени во Струга, во семејството на грнчарот Ристе Миладин. Основно образование завршиле во Струга, а подоцна и гимназија во Јанина, денешна Грција. Константин дипломирал во 1852 година на Филозофскиот факултет во Атина, отсек грчка филологија. Со диплома на учител браќата се вратиле во родниот крај каде учителствувале во повеќе места. Во училиштето во Охрид, Димитар Миладинов се сретнал со познатиот руски научник, славистот Виктор Иванович Григорович. Оваа средба била пресудна Миладиновци да почнат да се занимаваат и со собирачка дејност – собирање и запишување македонски народни песни и други умотворби, кои подоцна ги отпечатиле во Зборникот.